“港姐十強”搲完免費餐“走數” 嫌疑人黃婉恩補鑊?

前新城DJ林柏希近年積極發展餐飲界公關事業,惟日前他在私人社交網戶口玩“揞名爆”,指一名TVB女藝人“食完松”走數,而她更曾是“港姐十強”的落選港姐,他說:“今次交手嘅女仔,可以話用一個Tea set嘅價錢已經睇到佢嘅品行。”惟事件曝光後,他立刻把貼文刪掉。

林柏希詳述“案發經過”,指他同事有次跟他說,指該位“港姐十強”主動透過IG聯絡他當公關的餐廳:“問我畀唔畀佢嚟tasting(即系請佢食),講真,我完全唔知佢乜水,見佢都有三萬幾個followers,就諗住互惠互利啦!我請你食冇問題,叫佢之後出返個IG wall post囉,我講明唔系齋IG story,系wall post,咁系你主動嚟R(搲),又唔系我朋友,亦唔系我邀請,公事公辦在商言商,我提出嘅要求,你做到就嚟,唔想嘅咪算囉,或者你可以畀錢幫襯我畀個折你都得,最重要大家開心,唔好任何一邊蝕底。”

雖然事先講明,但林柏希想不到“港姐十強”會“走數”:“即日佢系有出到一個IG story,不過只有佢個背部又冇個tea set。”而他更附上對方的網曬的“背部圖”作證,同時他說雖然“唔收貨”,但“廢事好似催人咁”,所以冇立刻追問。他指“過咗十日八日”,該“港姐十強”冇動靜,同事聯絡她卻冇回覆。

惟在同事聯絡不果的當晚,發現“港姐十強”:“就出咗一個 IG wall post,雖然張相個focus只系喺佢個樣,個tea set系blur(模糊)嘅,似道具feel(應該系用portrait mode影嘅),亦冇tag餐廳,不過見佢有location checked-in,我覺得OK啦,始終我哋真系無畀過hard cash對方,不能過份要求嘛,明嘅。但系,喺跟住嗰日我同事想cap返圖做media clipping嗰陣,發現佢竟然已經 DELETE 咗個 post啦,系呀,DELETED!!!”

林柏希忍不住怒轟該名“港姐十強”冇誠信:“一個 tea set 值幾錢吖?原來你個朵就系值咁多㗎咋?哈哈!仲有,真系唔系我迫你出post㗎,系你主動R跟住自己應承咋,原來你嘅誠信只系值一晚。講真,我完全冇嬲,只系覺得佢 cheap,好肉酸呀!唔好再用呢啲招數去其他餐廳呃飲呃食喇,真系影衰曬㗎!!”

究竟“港姐十強”是誰,立刻引起全城網民猜猜猜,伍樂怡、黃子桐、何泳芍及蔡嘉欣等成為“嫌疑人”,惟有網民憑林柏希網曬的“背部圖”,聲稱是2020年落選港姐、現為無綫娛樂新聞台主持黃婉恩。之後更有網民發現“港姐十強”走數一事曝光後,指黃婉恩在IG個人資料一欄刪除“Miss HK 2020(Top 10)”的字句外,更把她之前隱藏的貼文“翻生”,貼文中不單有她歎tea set的相,更標簽了餐廳名字。

這相片對比林柏希網曬的“背部圖”,相中人的發型及服飾極為相似。同時有不少網民在黃婉恩這個貼文下留言,指她疑似“補鑊”:“原來系你?”、“因為世上冇免費嘅午餐,所以轉攻下午茶?”、“啱啱先編輯(貼文),睇嚟好驚!”、“R(搲) tea set kol”

林柏希今日(16日)回覆東網﹕“佢最後叫做有甫過(社交網),但系唔夠12個鐘就刪除咗或者隱藏咗(個貼文),依家有報道又放出來(貼文),點解要做呢個動作?我覺得好奇怪,我唔系要針對佢,我都要同老板交待,呢事件我系公事公辦,以事論事。我唔開佢名,因為我唔想公審佢,唔想好似我去恰個女仔咁,希望大家警醒啲,唔好再有呢件事發生,事後有好多人私訊我,原來或多或少都遇過呢啲情況,我講出來好似幫大家吐咗個冤氣。”他希望借此事提醒飲食業或娛樂業界,誠信很重要,並指事件後對方沒有直接聯絡過他。問到“港姐十強”是否黃婉恩?他說﹕“我冇講過系邊個,網民估到系佢哋嘅事。”

更多香港娛樂動態

全站最新消息

d